CEBU, Philippines - Nipahigayon og massive vaccination ang kagamhanan sa Dakbayan sa Sugbo sa mga iro ug iring aron dili mahitabo ang susama sa Dakbayan sa Mandaue diin ubay-ubay ang napaakan sa irong buang.
Matud ni Dr. Alice Utlang, pangulo sa Department of Veterinary Medicine and Fisheries sa Dakbayan sa Sugbo, nga sukad Enero 3 nipahigayon sila og intensive massive vaccination sa kabarangayan sa dakbayan diin karong adlawa anaa sila sa Lahug, Guadalupe, Sambag 1, Sambag 2 ug Banilad tungod kay usa sa ilang tumong nga mahimong zero rabies ang siyudad sa 2018.
Sumala pa ni Utlang nga gihimo nila ang libre nga pagpamakuna aron ang mga iring ug iro dili matakdan sa rabies ug dili risgo kung kini makapaak.
Gitug-an ni Utlang nga protocol nila sa DVMF nga kung adunay barangay nga magpositibo sa rabies, awtomatik silang magpahigayon og impounding ug massive vaccination sa lugar hangtud sa 5-kilometer radius.
Aron malikayan ang rabies, awhag ni Utlang sa katawhan nga kung schedule sa ilang barangay mas maayong magpabakuna sila sa ilang iro ug iring kay libre kini.
Si Utlang nitug-an nga tinguha gyud nila nga dili mahitabo sa dakbayan ang nahitabo sa Mandue hinungdan sa subsob ang ilang pagpamakuna ilabi na nga nakadawat sila og vaccine gikan sa Bureau of Animal Industry bali og 50,000 kabuok nga balor og P5 milyones.
Ang 22 ka napaakan sa irong buang sa Casuntingan, Dakbayan sa Mandaue, ang gihatagan sa kagamhanan og libre nga anti-rabies injection.
Si Dr. Edna Seno, pangulo sa Mandaue City Health Office, niingon nga base sa ilang pakisusi sa kahimtang sa panglawas kagahapon sa buntag sa mga biktima ilang nasuta nga anaa silang tanan sa luwas nga kahimtang.
Si Casuntingan Barangay Kapitan Oscar del Castillo kinsa lakip usab sa napaakan niingon nga lakip na lang sab siya sa nagpa-injection.
Gitataw niya nga gamay lang gyud kaayo ang agi sa ngipon sa iro sa iyang bitiis atol sa ilang pagdakop apan wala lang gyud siya mokompiyansa.
Ang mga biktima higpit nga gipahimangnoan ni Seno nga dili gyud moinom og ilimnong makahubog sulod sa 28 ka adlaw samtang gipaubos pa sila sa pagtambal.
Gitataw ni Seno nga ang kagamhanan adunay igong supply sa medisina sa anti-rabies.
Iyang gipasabot nga ang ulo sa iro ilang gi-preserbar sa ice ug gipadala sa Tacloban City, Leyte alang sa laboratory test tungod kay bugtong lang ang maong dapit ang adunay kahimanan sa pagsusi niini.
Molungtad og tulo ngadto sa lima ka adlaw mahibaw-an ang resulta kung may rabies ba ang namatay nga iro.
Si Mandaue City Mayor Gabriel Luis “Luigi” Quisumbing hugtanon nga nag-awhag sa publiko sa pagtaho gilayon ngadto sa ilang buhatan sa higayon nga makamatikod kini og iro o bisan unsang matang sa mananap nga kadudahan ang panglihok-lihok aron kalikayan nga masubli pa ang maong panghitabo.
Matud ni Quisumbing nga karon pa nahitabo nga ang usa ka iro daghan ang napaakan.
Samtang ang Cebu Provincial Health Office nibutyag nga upat ang natala nga namatay tungod sa rabies sa tibuok lalawigan sa niaging tuig. Moabot og 23,302 ang kaso diin mas ubos kini kaysa 23,629 ka kaso sa tuig 2015.
Sa 16 ka provincial ug district hospitals, matud ni Amaraga nga ang Pinamungajan District Hospital lang ang walay animal bite center apan adunay na-establisar sa ilang rural health unit. Rowena D. Capistrano, Romeo T. Limpangog, Lendilyn Alquilos ug Le Phyllis F. Antojado (BANAT NEWS)