CEBU, Philippines - Niabot sa 90 ka traffic vests ang nadawat sa kagamhanan sa Siyudad sa Talisay gikan sa mga negosyante sa maong siyudad alang sa mga sakop sa City of Talisay-Traffic Operation Development Authority (CT-TODA).
Gipahibawo ni Jomar Rubio, executive secretary ni Mayor Eddie Gullas nga daku nilang kalipay sa suporta nga gihatag ni Jack Gaisano, ang tag-iya sa Tita Gwapa (Metro Fresh) nga tindahan sa Tabunok.
Matud ni Rubio nga nabantayan ni Gaisano nga bugtong green nga uniporme lang ang pangsul-obon sa mga traffic enforcer diha sa kadalanan hinungdan nga iya kining gihatagan og neon nga mga vest aron sila dali nga makita isip mga tinugyanan sa kadalanan.
Siya nagkanayon nga ang ilang pundo nga ipalit sa mga vest mahimo na unya nila nga magamit sa laing programa aron mapalambo ang opisina sa CT-TODA.
Ang mga vest gihatod ni May Sacedor, ang area manager sa Metro Gaisano ingon man ni Roy Kyamco nga ilang Vice President sa Security Department ug ni Mel Rick nga mao sab ang General Staff sa Metro Gaisano group.
Ang maong mga vest pormal nga gidawat nila ni Hiram Benatiro, ang pangulo sa CT-TODA ingon man ni Mayor Eddie Gullas. (BANAT NEWS)