CEBU, Philippines - Gipusil sa nagmotorsiklo nga mamumuno ang usa ka lalaki nga nag-imbentaryo sa halin sa ilang lechon manok sa Bascon St., Dumlog, Dakbayan sa Talisay niadtong Miyerkules sa gabii.
Ang biktima mao si Hector Zanoria, 40-anyos, minyo nga nagpuyo sa nahisgutang lugar.
Matud ni PO3 Edwin Campomanes sa Talisay City Police Station nga nagsul-ob og full-faced helmet ang drayber sa motorsiklo samtang nagtaptap og panapton sa iyang nawong ang backrider nga maoy nipusil sa biktima.
Naigo sa tiyan ang biktima hinungdan sa iyang pagkahagba samtang nipaturatoy sa pagpadagan sa ilang motorsiklo ang mga mamumuno.
Nagkanayon si Campomanes nga ang gikakontra sa biktima mao ang nagsige og hagad niya og sinukmagay nga lalaki nga naa sa barberohan nga tapad ra sa ilang tindahan.
Apan ang biktima niingon nga wala siya nikagat sa hagit sa lalaki tungod kay maapil siya sa pagkabuang.
Si Campomanes nibutyag nga diha magsugod ang ilang imbestigasyon labot sa pagpamusil sa biktima. (BANAT NEWS)