CEBU, Philippines - Girelibuhan sa niagi pang buwan ang collecting clerk sa Daanbantayan District Hospital kinsa gireklamo sa paryente sa usa ka pasyente tungod sa ngil-ad nga pamatasan.
Niadtong unang semana sa Disyembre 2016, si Maria Ana Pepito nag-post sa iyang reklamo sa Facebook alang kang Gobernador Hilario Davide III ug sa Provincial Health Office (PHO).
Si Pepito nipasangil nga ang maong tambalanan dili sab mo-isyu og resibo sa weekends ug nipasangil sab siya nga ngil-ad og batasan ang cashier sa maong tambalanan tungod kay giingong wala tarunga niini og tratar ang iyang ig-agaw.
Ang hepe sa tambalanan nga si Dr. Abraham Maderazo niduso og report ngadto sa PHO kabahin sa maong hitabo.
Si Maderazo nipasabot nga walay item sa cashier position ang tambalanan hinungdan nga ang kahera usa ka job order maoy collecting clerk matag weekend sanglit ang permanente nga kawani sa Lunes lang hangtud Biyernes ang trabaho.
Ang maong JO giingong dili makaisyu og resibo tungod kay dili siya bonded nga maoy rekisitos sa Department of Finance hinoon makaisyu siya og temporary receipt.
Sa isyu nga walay pamatasan ang cashier, si Maderazo nagkanayon nga dili sila mo-tolerate niini tungod kay isip public servants kinahanglan nga mohatag kini og respeto ug maayong serbisyo ngadto sa katawhan.
Sa maong insidente, ang collecting clerk girelibuhan sa iyang trabaho ug gipaubos sa reprimand sa hepe sa tambalanan. (BANAT NEWS)