Kapin P400K shabu nakuha gikan sa 3 ka dinakpan
CEBU, Philippines - Sa sulod sa prisohan gisaulog ang Bag-ong Tuig sa tulo ka mga lalaki nga nadakpan sa buy-bust operation nga gihimo sa mga sakop sa Provincial Intelligence Branch sa Cebu Provincial Police Office sa Sitio Balhaan, Brgy. Madridejos sa Lungsod sa Alegria pasado alas onse sa buntag niadtong nakalabay nga adlaw.
Ang tulo ka dinakpan giila nga sila si Noriel Borromeo, John Baxter Javierto ug Jay Warren Ferolino, pulos mga hingkod ug nagpuyo sa nahisgutang dapit.
Sa impormasyon gikan sa kapolisan, nasayran nga target sa ilang operasyon si Borromeo human masayri nga padayon gihapon kini sa iyang pagnegosyo og ginadiling drugas.
Gamit ang P500 nga marked money nasikop ang tulo human nakatunol og usa ka pakete sa gituohang shabu si Borromeo ug Javierto.
Narekober sa mga polis gikan kang Borromeo ang 43 ka gagmay nga pakete sa gituohang shabu ug duha ka dagku nga putos, samtang miabot sab og 37 ka gagmay nga pakete ang nakuha gikan kang Javierto ug 3 ka gagmay nga pakete sab ang nakuha gikan ni Ferolino.
Mitimbang og 34 gramos ang drugas nga nakuha gikan kanila nga nikantidad og P401, 200.
Gawas sa drugas nakuha sab sa mga polis ang usa ka .45 nga pistol nga adunay lima ka bala uban ang usa ka holster. - /DILT (BANAT NEWS)
- Latest
