CEBU, Philippines – Dili lang ang mga chief of police ang delikadong matangtang sa puwesto apan apil sab ang ilang mga labaw kung dili makasulbad sulod sa 24-oras kung dunay duha ka insidente nga mahitabo nga “stray bullet” sa ilang dapit.
Ang director sa Police Regional Office-7, Chief Supt. Noli Taliño, nipasabot nga nakabutang sa memorandum gikan ni Police Director General Ronald “Bato” Dela Rosa nga kung moabot sa duha ka hepe ang marelibuhan sa puwesto, lakip sa relibuhan ang director sa kapolisan sa usa ka dakbayan ug probinsiya.
Lakip ang regional director ang manubag ngadto sa buhatan sa PNP chief kung moabot sa duha ka provincial o city directors ang marelibuhan sa puwesto.
“In the same manner kung dalawang provincial directors or city directors ang ma-relieve sa Region-7 ako ang mananagot din, kasama din ako,” pasabot pa ni Taliño.
Ang maong paagi gihimo sa kapolisan aron mahimo gyud ang pagpangita sa mga responsable sa pagpabuto og armas ug mahatagan og hustisya ang mga mabiktima sa “stray bullet”.
Tumong sa kapolisan nga mahimong “zero incident” sa indiscriminate firing ug sa pagpabuto og armas sa pagsugat sa Bag-ong Tuig. - /GMR) (BANAT NEWS)