CEBU, Philippines - Si Bise Gobernador Agnes Magpale mipahimangno sa mga magtutudlo nga maoy mangulo paggiya sa kabataan may labot sa plano sa Department of Health (DOH) sa pagpanghatag og condom ngadto sa mga eskwelahan sa ilang kampaniya batok sa Human Immunodeficiency Virus (HIV) ug Acquired Immunodeficiency Syndrome (AIDS).
Sa iyang pakigpulong sa gipahigayong Teacher’s Night sa lungsod sa Tudela niadtong Martes si Magpale nagkanayon nga kinahanglang padayonon sa mga magtutudlo ang paggiya sa kabataan sa moral values.
Sugod sa sunod tuig ang DOH giingong manghatag og condom ngadto sa mga tunghaan tibuok nasud, butang nga miani dayon og mga pagsaway sa nagkadaiyang sektor.
Usa si Magpale ug si Gob. Hilario Davide III sa nipadayag dayon og pagsupak kay daw naghatud kini og sayop nga mensahe ngadto sa kabataan.
Si Davide mihulagway nga sama ra og nagpasabot nga mahimo ra ang pre-marital sex basta mogamit lang og condom.
Si Magpale kinsa chairman sa committee on women, family and minors nagkanayon nga ang pagpanghatag og condom ngadto sa mga eskwelahan makapaubos kini sa moral values.
Matud ni Magpale nga ang pagpanghatag og condom dili maoy solusyon sa problema sa HIV/AIDS ang angayang buhaton mao ang pag-umol sa kabataan aron sila mahimong maayong Kristiyano.
Base sa report, miabot na ngadto sa 38,114 ang kaso sa HIV nga natala sa DOH gikan sa tuig 1984 hangtud sa buwan sa Oktubre niining tuiga diin 32,099 niini na-tally gikan sa tuig 2011 ngadto sa 2016.
Giingong 10,279 nga kaso sa HIV ang nagpanuigon gikan sa 15 ngadto sa 24-anyos.
Sama ni Cebu City Mayor Tomas Osmeña sa Syudad sa Sugbu, wala say supak si Talisay City Mayor Eduardo Gullas sa laraw sa Department of Health (DOH) nga mangapud-apod og condom sa mga tunghaan.
Matud pa ni Gullas base sa mga nanggawas nga report gikan sa DOH nagkaanam sa pag-ubos ang pangidaron sa mga kabataan nga nisulod niining pre-marital sex, timailhan niini kining nagkadaghang kabataan nga nasakit og HIV/AIDS. (BANAT NEWS)