CEBU, Philippines - Gipahibawo sa Talisay City Engineering Department nga posible sa unang kwarter sunod tuig masulbad na ang dugay na nga giproblema sa katawhan sa may eskina Bihonan sa Brgy Cansojong diin adunay nagpundo nga tubig sa dalan.
Si Engr. Gamaliel Gam, nibutyag nga aduna na silay giplano sa lugar ug nakakita na sila og asa makalusot ang tubig sa dapit.
Matud niini nga nagkaproblema sila sa niaging katuigan human gisira sa usa ka pribadong indibidwal ang kanal nga kalutsan sa tubig. Sa ilang pakisusi nakapakita gyud og titulo ang maong indibidwal nga iya ang lugar nga giagian sa tubig kanal.
Asoy pa ni Gam nga dili na sila muagi sa gisira nga kanal ug adto na sa pikas kanal ipaagi ang tubig ug ilang patas-an ang pagsemento sa karsada.
Siya nagkanayon nga dugay na gyud kini nga problema sa mga motorista nga mag-agi-an lakip na ang mga residente sa lugar.
Dugang ni Gam nga tua na ang mga dokumento sa buhatan ni Mayor Eduardo Gullas ug ang pag-aprubar na lang ang kuwang kay nisanong na man ang opisyales sa barangay niini. Gibana-bana nga ila kining gahinan og P2 milyones ang maong proyekto aron wala na’y mga tawo nga maperwisyo sa pag-agi sa dapit. (BANAT NEWS)