CEBU, Philippines - Nagkadaghan ang mga nisanong sa Surrender to God (SuGod) Program sa Archdiocese of Cebu ug Love of God Community.
Kini ang gipadayag sa executive director sa SuGod Program, Fe Barino, human 81 ka respondents ang bag-o lang nigradwar sa drug rehabilitation program. Matud ni Barino nga abot na sa laing lugar ang ilang programa ug tinguha usab nila nga mohimo og mga payag-payag aron adunay kadangpan ang mga respondents sa higayon nga gusto nilang adunay bag-ong environment human sa ilang training.
Mapasalamaton si Barino sa tanang nitabang sa programa tungod kay sa upat pa lang ka batches, ilang napahigayon nga libre ug sobra na sa milyon ang ilang nagasto
Si Fr. Ramon Fred Ofredo, spiritual director sa SuGod Program, atol sa Santos nga Misa nga gipahigayon sa wala pa ang gradwasyon niawhag sa mga respondents sa paggamit sa ilang nakat-onan alang sa kabag-ohan.
Matud ni Ofredo nga dili sa shabu makita ang kalipay kung dili naa sa panimalay kauban ang ilang pamilya nga maoy mounong kanila sa higayon nga biyaan sila sa ilang mga higala nga sa kalingawan ra makauban.
Emosyonal ang gradwasyon sa SuGod Program tungod kay tanang respondents ang hugot gyud nga niyukbo sa krusipikasyon sa Dios.
Usa ka managpuyo nga taga Lahug, Dakbayan sa Sugbo nitug-an nga minor de edad pa lang sila nagsugod na sila sa paggamit sa ilegal nga drugas.
Ilang pangandoy ang kabag-ohan samtang gikatakda na sila nga kaslon sunod buwan ug nanghinaut nga magmakanunayon na sila sa ilang pagpuyo. Atol sa gradwasyon gi-turnover sab ang SuGod Wheels of Hope isip panginabuhian sa magtiayon nga nakagradwar sa unang batch tungod kay nakapasar kini sa criteria.
Ang magtiayon kinsa nitug-an nga tulo ka buwan na silang wala nagumon sa drugas human nakagradwar sa SuGod Program ang nanawagan sa ubang nalambigit sa ginadili nga drugas nga dili magpakawala sa paglaum sa pagpakabuhi.
Gawas sa magtiayon, laing 20 ka respondents sa unang batch ang napaubos sa skills training nga gihatag nga libre ni Romelito Mantuhac sa Cebu Science of Welding and Skills Technology, Inc. tungod kay iyang nakita nga gikinahanglan usab sa mga gradwado ang panginabuhian human sa ilang seminar. (BANAT NEWS)