CEBU, Philippines - Patay ang usa ka 26-anyos nga lalaki human kini nakuryentihan niadtong Sabado sa gabii samtang kini nagtrabaho sud sa usa ka baboyan sa Brgy. Sacsac, sa Lungsod sa Pinamungajan.
Ang nakuryentihan mao si Regil Alcos, residente sa nahisgotang barangay.
Base sa imbestigasyon sa kapolisan nga si Agustin Leyson, 47, kagawad sa barangay mipahibalo sa ilang buhatan kabahin sa maong aksidente diha sa ilang dapit.
Sa pagsubay nilang Senior Police Officer 2 Peter Cuanso, Jr. ug mga kaubanan ilang nasayran nga drayber diay sa ilang delivery truck ang namatay.
Matud pa nga nagmaneho sa trak si Alcos nga nagkarga og mga pagkaon sa mga baboy niadtong tungora apan aksidente niyang naigo ang mainline sa kuryente sa ilang trabahoan.
Tungod niini, nakuryentihan si Alcos ug dali untang gidala sa Pinamungajan District Hospital apan nakabsan kini sa kinabuhi.
Ang kapolisan padayon pang naghimo og imbestigasyon bahin sa maong insidente. Gikan sa The Freeman (BANAT NEWS)