CEBU, Philippines - Patay ang giilang top drug personality sa Lungsod sa Consolacion dihang napusilan sa buy-bust operation diha sa East Binabag, Brgy. Tayud sa nahisgotang lungsod.
Si Police Officer 1 Ritchie Guilleran sa Consolacion Police Station miila sa suspetsado nga namatay nga mao si Willy Achay, 43, nagpuyo sa maong dapit.
Matud pa ni Guilleran nga ang ilang kauban nga polis maoy nagsilbing poseur buyer nakigsabot sa maong suspetsado nga mopalit og shabu, human sa binayranay ilaha unta kining gidakop.
Apan giingong nibunot kini og armas ug gipamusil ang mga polis apan wala kini makaigo kay nakaligid padung sa haligi ang polis ug nabawsan kini sa mga otoridad ug naigo sa iyang kalawasan.
Dali unta kining gidala sa Vicente Sotto Memorial Medical Center sa dakbayan sa Sugbo apan gideklarar kini sa mga doktor nga dead on arrival.
Nakuha ang .45 caliber pistol uban sa unom ka bala ug mga kabhang ang usa ka kabhang ang naa sa sulod sa magazine, gagmay nga paketeng shabu ug mga drugs paraphernalia. Samtang upat ka tawo nga nalambigit sa ilegal nga drugas ang nasikop sa buy-bust operation diha sa Sitio Balanghoy, Brgy. Gun-ob sa Dakbayan sa Lapu-Lapu.
Ang nangadakpan mao sila si Mark Regan Blanco, 29 anyos; Jeffrey Villaganes, 42; Antonio Torrejos, 33; ug Jona Ybañes, 29. Sila nasikop sa mga operatiba sa Lapu-Lapu City Police Office- City Intelligence Branch.
Matud ni Police Chief Inspector Mark Gifter Sucalit, hepe sa LCPO- CIB nga ang tulo sa upat nga suspetsado nga silang Blanco, Villaganes ug Ybañes maoy nakigtransaksyon sa police poseur buyer samtang si Torrejos ang ilang look-out. Wa makaporma ang upat dihang kalit silang gisikop human natunol ang drugas ug nakuha gikan kanila ang mga pinutos nga shabu ug kwarta nga P600.
Samtang sa Sitio Seabreeze, Brgy. Mactan nadakpan sab sa buy-bust ang duha ka nitahan na sa Oplan Tukhang nga silang Renante Badayos, 37; ug Johnny Maloloy-on, 24; ug mga kaubang sila si Randolph Silawan, 23; ug Delio Costura, 32.
Matud ni Police Inspector Ronnie Acar sa Mactan Police Station, nakuhaan og 15 ka putos sa shabu si Badayos samtang lima ka putos nakumpiska gikan kang Maloloy-on. Samtang nagkalain-laing drug paraphernlia ang nasakmit gikan kang Silawan ug Costura.
Sa laing operasyon, nadakpan usab sa mga sakop sa Mandaue City Police Office diha sa Sitio Fatima, Brgy. Jagobiao, si Jefferson Oconesa alyas Atat, 39, kinsa nakuhaan og mga pinaketeng shabu. Romeo T. Limpangog ug Christell Fatima Tudtud (BANAT NEWS)