CEBU, Philippines - Bisan sa kahigpit sa mga nagbantay diha sa Cebu Provincial Detention and Rehabilitation Center (CPDRC) wala managana og “bombing” (labay og shabu) paingon sa sulod ang duha ka lalake nga nagsakay og motorsiklo.
Si Roberto “Bobby” Legazpi, officer-in-charge sa CPDRC mibutyag nga ang maong insidente nahitabo duha ka semana na ang nalabay.
Giputos og papel ang usa ka paketeng shabu nga gipataban og duha ka sinsilyo aron mabug-at ini’g labay apan palpak ang nilabay niini kay nasangit sa atop dapit sa entrance sa CPDRC.
Matud ni Legazpi nga ang nahisgutang mga lalake nanuktok sa gate diha sa entrance ug nananghid nga mosaka sa atop kay duna silay kuhaon apan ang polis nga nagbantay wala mosugot. Ang maong mga lalake wala mailhi tungod kay wala huboa ang mga helmet niining gisul-ob dali dayong nibiya sa lugar. Sa pagsusi sa mga gwardiya sa dapit diin giingong adunay kuhaon ang duha nakita nila ang usa ka papel ug dihang ilang gisusi duna kini shabu.
Tungod sa nahitabo, pabutangan na unya og K9 diha sa gawas sa entrada sa CPDRC alang sa ipahigayong random inspectios sa mga selda. (BANAT NEWS)