CEBU, Philippines - Gipalawman sa Commission on Human Rights ang imbestigasyon sa kamatayon sa usa ka organizer sa Partido Manggagawa sa Maghaway, Dakbayan sa Talisay niadtong Septiyembre 17 sa gabii.
Kini ang gitug-an ni Leo Villarino, chief investigator sa CHR-7.
Matud ni Villarino nga nipahigayon sila og motu propio investigation human sa ilang tigum nga gipahigayon tali sa Regional Tripartite Monitoring Board kinsa gipangayuan og report gikan sa International Labor Organization gumikan sa kamatayon ni Orlando Abangan.
Sumala pa ni Villarino nga ilang susihon ang mga nakuha nilang impormasyon kung may labor-related o dili ang kamatayon ni Abangan human usab nakakuha og kasayuran nga ang nagpatay nga si Julian Bonghanoy Jr. napatay sab sa usa ka raid sulod sa balay sa usa ka konsehal sa Maghaway.
Dugang ni Villarino nga karong Oktubre 28, ang RTMB mag-abot aron tukion ang report sa kapolisan ug CHR aron moduso kini og opisyal nga report sa ILO nga nangayo og katin-awan labot sa kamatayon ni Abangan. (BANAT NEWS)