CEBU, Philippines - Gidakop ang usa ka babaye human kini nasakpan nga naghupot og singkwenta ka pakete sa gidudahang ginadiling druga nga mobalor og P15 mil kagahapon pasado alas onse sa buntag sa eskina Tupas, Brgy.Sawang Calero, Cebu City.
Ang maong suspetsado giila nga si Ruby Falcon, 34, molupyo sa maong dapit apan kusganong mihimakak sa alegasyon sa pulis.
Si Falcon dihang nahinabi sa Banat News miingon nga wa siya masayod kun drugas ang nakuha kaniya.
“Gibilin ra man na sa ako wa man ko kahibaw nga mao diay to ang sulod.Nikalit lang og sulod ang mga polis sa among silong niya ipagawas daw nako [ ang gidudahang druga],” matud pang Falcon kinsa adunay gipaeskuylang mga anak sa elementarya.
Apan matud ni Police Officer 3 Dexter Costillas sa San Nicolas Police Station, ilang nadakpan ang suspetsado atol sa saturation drive batok ilegal nga drugas ug krimen sa maong lugar nga kadudahan ang mga lihok dihang nabantayan kining dunay butang nga gidalidali niini og pasok sa pitaka.
Ang operasyon gipangulohan sa ilang hepe nga si Police Chief Inspector Keith Allen Andaya. Ugmang adlawa ipasaka sa kapolisan ang kaso batok sa suspek. (BANAT NEWS)