2 traffic enforcers nangilkil gipangtaktak

CEBU, Philippines - Duha ka traffic enforcers dinhi sa Dakbayan sa Sugbo ang girekomendar nga taktakon sa ilang katungdanan human gipasanginlang nangilkil sa madakpan nilang mga drayber. Si Francisco “Isko” Ouano, hepe sa operations division sa Cebu City Transportation Office (CCTO), miingon nga ang iyang rekomendasyon giduso na niya ngadto sa opisina ni Mayor Tomas Osmeña.

Matud ni Ouano nga ang iyang gihimo mao ra’y pagtuman sa kamandoan ni Osmeña kaniya nga limpyohan ang CCTO gikan sa mga kurakot nga traffic enforcers nga nakaduhig og kauwawan sa ubang nagtinarong.

Wala hinuon ibutyag ni Ouano ang ngalan sa duha ka traffic enforcer nga ilang nasuta nga hilabihan kakusog mangilkil, ug gani nataktak na kini kaniadto apan nakabalik tungod sa ilang mga padrino.

Naglaum si Ouano nga ang mga padrino niining maong mga traffic enforcer dili na unta molaban sa ilang mga tinudlo nga nagpakauwaw lang kanila. Si Ouano miingon nga sigurado siya nga ang mga padrino niining maong mga traffic enforcer, usa kanila usa ka konsehal sa dakbayan, wala gayud masayod sa ilang binuhatan.

Human si Ouano mipahibalo nga may girekomendar siyang taktakon sa serbisyo, may mga report nga nangabot ug nagpahibalo pa sa dugang enforcer nga naghimo og binuang.

Usa sa mga enforcer, gireport mismo sa iyang kauban, nga matud pa magkolektahan og “payola” gikan sa tagdumala sa dakong hardware sa Mabolo aron nga dili panakpon ang ilang mga sakyanan nga ipangparada daplin sa karsada nga gireklamo sa mga motorista. (BANAT NEWS)