Dugang gambling machines nasakmit

CEBU, Philippines - Nasakmit sa kapolisan sa Dakbayan sa Talisay ang upat ka video karera ug tulo ka moli-moli machines niadtong adlaw nga Domingo.

Tungod sa subsob nga operasyon, niabot na sa gawas sa buhatan sa kapolisan ang mga nasakmit nga ilegal nga makina gumikan sa kadaghan na niini.

 Si Supt. Aileen Recla, hepe sa kapolisan sa dakbayan, niingon nga iyang gibana-bana nga dili mominus sa 20 na ka ilegal nga makina ang ilang nasakmit sa ilang gipahugtan nga kampanya sa ilegal nga makina sugod niadtong niaging semana.

Ang labing uwahing pagpanakmit nahitabo sa Sitio Isla Puwa, Barangay San Isidro.

Ang mga operatiba nakakuha og tulo ka video karera ug tulo ka moli-moli apan wala nay mga nagduwa niini.

Ala 1:30 sa hapon nirumbo ang kapolisan sa Central Biasong ug ilang nakuha ang usa pa ka video karera machine samtang walay nasikop nga nagduwa.

Si Recla nibutyag nga ang tanang makina iyang itugyan ngadto ni Mayor Eduardo Gullas aron dungan kini nga gub-on. (BANAT NEWS)

Show comments