CEBU, Philippines - Kritikal ang kahimtang sa usa ka gidudahang pusher og shabu nga bisan gituktok hangyo (tukhang) na sa kapolisan apan wala gyud kini motahan hangtud nga gipusil kini sa wala hiilhing mga lalaki nga nagsakay og motorsiklo alas 11 pasado sa niaging gabii sa Star Apple, Umapad, Dakbayan sa Mandaue.
Si Police Officer 3 Isagani Garcia sa Presinto 5 sa Mandaue City Police Office nga nagbase sa Barangay Opao niila sa biktima nga si Joel Serecon Peros, 28, nagpuyo sa maong dapit.
Matud ni Garcia nga nagbarug-barug lang sa daplin sa karsada ang biktima dihang kalit lang nihunong sa atubangan niini ang motorsiklo nga giluwanan sa duha ka wala hiilhing lalaki nga nag-helmet.
Dugang ni Garcia nga ang backrider kalit lang niibot sa giluklok nga armas dayon pusil ngadto sa biktima sa makatulo ka higayon ug ang biktima nga nakahigayon pa sa pagdagan ug ang duha dali sab nipabulhot pahilayo sa maong dapit.
Ang biktima unang gidala sa Mandaue City Hospital sa iyang mga sakop sa pamilya apan human sa paghatag og pasiuna nga pagtambal gibalhin kini sa Vicente Sotto Memorial Medical Center.
Si Garcia niingon nga ang biktima usa sa mga nalambigit sa ilegal nga drugas sa maong dapit apan wala gyud kini mopakita sa ilang buhatan ubos sa Oplan Tukhang ug nagpadayon sa ilegal nga kalihukan. (BANAT NEWS)