CEBU, Philippines - Gibuksan na ang canyoneering sa Canlaob, Lungsod sa Alegria niadtong Septiyembre 1 human naandam na ang lokal nga kagamhanan ug ang Alegria Tour Operators Association (ATOA) sa mga safety measures.
Matud ni Mayor Verna Magallon nga luwas na ug organisado na ang pagpahigayon sa canyoneering karon.
Ang Provincial Disaster Risk Reduction and Management Office (PDRRMO) nagpahigayon og inspection sa Personal Protective Equipment’s (PPE) nga gamiton sa canyoneering activity.
Ang PPEs butangan og tag timailhan nga nakapasar kini sa inspection ug ang mga tour operators gi-require usab og safety management plan alang sa ilang accreditation.
Nikabat sa 70 ka tour guides gikan sa Alegria ug Lungsod sa Badian ang nipaubos sa ladderized training sa Basic Rope Rescue (BRR) ug Swift Water Rescue (SWR) alang sa subling pagbukas sa canyoneering.
Human sa mga aksidenteng nahitabo ang canyoneering sa Lungsod sa Alegria ug Badian temporaryo kining gipahunong ni Gobernador Hilario Davide III sulod sa duha ka buwan sugod niadtong Hunyo 1, 2016 alang sa mga safety measures nga gihimo. (BANAT NEWS)