CEBU, Philippines - Gitinguha ang pagdili na sa hingpit sa tanang dapit sa Lalawigan sa Sugbo sa paggamit sa mga liquefied petroleum gas (LPG)-refilled butane canister.
Si Bokal Glenn Bercede, chairman sa committee on environment sa Provincial Board, niduso og ordinansahon tumong niini.
Matud ni Bercede nga ang ordinansahon natigayon human usab sa iya gihimong pagpangunsulta kang Department of Energy-7 Director Antonio Labios kinsa nipasabot nga ang LPG-refilled butane canister ang higpit gyud nga gidili.
Kini gumikan kay naghatag lang kini og kakuyaw sa sunog gumikan kay dili na man masubay ang standard nga gikinahanglan alang sa luwas nga paggamit niini.
Ang paggamit sa mga LPG-refilled butane canister ang gidili na sa kagamhanan sa Dakbayan sa Mandaue pinaagi sa ordinansa nga giaprobahan ug gipangamahanan ni kanhi konsehal Jimmy Lumapas.
Gidili usab ang paggamit sa LGP-refilled canister sa Dakbayan sa Lapu-Lapu pinaagi usab sa ordinansa nga gipangamahanan ni kanhi konsehal Alexander Gestopa Jr. (BANAT NEWS)