Wa nakaparehistro nagbagulbol

CEBU, Philippines - Liboan ka mga aplikante nga mga botante ang wala makaparehistro diha sa Commission on Elections (COMELEC ) regional office kagahapon human nga naabtan sila sa cut-off sa pagdawat sa mga magparehistro alang sa umaabot nga Barangay ug Sangguniang Kabataan.

Pipila sa mga aplikante ang mitawag sa  Comelec nga "paasa” o “pasalig” apan wala sila maatiman bisan og nigahin sila og panahon ug milinya bisan init ang adlaw apan wa gihapon sila marehistro.

Si Election Officer Edwin Cadungog miingon nga ang Comelec Central office lang ang makabuot  kun mosugot nga lugwayan ang rehistrasyon.

“We are only implementers sa unsa’y policy sa Comelec. We are not the Comelec but we are only part of the Comelec. Kung wa’y resolution or memorandum from the central office, nga dili muhatag og extension, dili pud ta mu-extend.

Pag-abot sa oras nga ihatag nga kutob ra anang orasa, which is 5 o’clock(sa hapon) dili na pud ta mosubra except kato lang naapil sa cut-off,” matud ni Cadungog. Sigon pa ni Cadungog nga 250 lang ka mga aplikante ang maatiman sa ilang computer, aduna lamang silay  upat ka computers.

Sumala pa ni Cadungog taas na kaayo ang panahong gihatag sa Comelec alang sa pagparehistro. Gani sa unang semana lang dihang gisugdan ang rehistrasyon 300 ra ka tawo ang nagparehistro.

Karon na lang nagkaduol na ang paghunong sa pagdawat og magparehistro miabot na og tag duha ka libo ang maglinya diha sa ilang buhatan apan di na nila sila tanan maatiman.

Apan si Paolo Martin Saberon, pangulo sa Cebuano Youth Ambassadors miingon nga misulay sila paghangyo sa Comelec kagahapon sa buntag sa pagpangayo og konsiderasyon apan giingnan siya nga bisan unsaon pa upat lang ka computers ang magamit.

“Considering this is a highly urbanized city  and the number of schools that we have here daghan kaayo sa mga high school and we expect na during Saturdays, mas daghan ang willing nga mo-register kay they could not get out to register, pag-abot nila diri  it’s already close,” pagmahay pa ni Saberon.  (BANAT NEWS)