CEBU, Philippines - Duha ka tawo patay ug usa samdan human gipamusil sa wala mailhing mga lalaki sa managlahing dapit sa Dakbayan sa Lapu-Lapu sugod sa miaging gabii sa Martes.
Sa alas 9:30 sa gabii, gipusil ang 29 anyos nga si Jerome Daitol diha sa Brgy. Pajo ug paglabay sa usa ka oras gitubag kini og laing pagpamusil sud sa Vertex Internet Café sa Sitio Sudtonggan, Brgy. Basak ug ang biktima mao si Antonio Amistoso,40.
Matud ni Senior Police Officer 2 Allan Pantaleon, imbestigador sa Lapu-Lapu City Police Office - Homicide Section kagahapon sa kaadlawon, samdan si Julijin Muana, 18, human gipusil sa wala mailhing tawo samtang kini naglingkod daplin sa kalsada sa Maximo V. Patalinjug, Brgy. Pajo.
Nagkanayon si Pantaleon nga pulos nagsakay og motorsiklo ang mga mamumuno sa tulo ka insidente ug gidudahang pulos may kalambigitan sa ilegal nga drugas ang motibo .
Gikatahong si Daitol nalakip sa drug personality watchlist sa Gun-ob Police Station 3. Nakuha sa crime scene ang usa ka kabhang gikan sa .9 mm pistol, cellphone, usa ka itom nga ski mask ug kwarta nga P480.
Samtang si Amistoso, matud pang Pantaleon giingong nalambigit usab sa ilegal nga drugas ug dugay na gitambagan sa iyaan nga mo-surrender aron malimpyo ang pangalan niini.
Nakuha sa crime scene ang tulo ka kabhang gikan sa .45 caliber og usa ka deformed slug, usa ka cellphone , lighter ug mga yawe niini.
Dugang ni Pantaleon nga si Muana kinsa nakadagan palayo bisan naigo nalambigit usab sa ilegal na drugas ug bugaw sa mga babaye.
Nakuha sa crime scene kung asa napusilan si Muana ang usa ka kabhang ug laing usa ka deformed slug gikan sa .45 caliber pistol.
Patay pareho sila Daitol ug Amistoso samtang si Muana gidala sa Vicente Sotto Memorial Medical Center.
Samtang didto sa Sitio Mohon, Brgy. Kawit, Lungsod sa Medellin patay ang usa ka gidudahang drug pusher nga una nang nitahan sa kapolisan human gikatahong nibalik kini pagpamaligya og shabu ug nakigpinusilay sa mga sakop sa Criminal Investigation and Detection Group (CIDG) 7 ug Medellin Police.
Si Senior Police Officer 1 Ryan Castro sa Medellin Police Station miila sa namatay nga si Arcenio Delao Potot, 56, nagpuyo sa maong dapit kinsa napusilan ug patay na pag-abot sa Bogo Provincial Hospital. (BANAT NEWS)