CEBU, Philippines - Positibo ang kasagarang reaksyon alang labing unang State of the Nation Address (SONA) ni Presidente Rodrigo Duterte kagahapon.
Matud ni Jaime Paglinawan, pangulo sa Bayan-Central Visayas ilang gihangop ang gipamulong sa presidente kay gipadangat niini ang problema sa mga mamumuo ug ang paglakip sa mga lider sa militanteng grupo sa iyang gabinete. Iya kining gihulagway nga usa ka maayong panag-ingnan sa pagkab-ot sa mga nindot nga kalambuan. Gani “8” nga grado ang iyang gihatag sa SONA ni Duterte kay ubay-ubay na ang nahimo niini bisan og pipila ka adlaw pa lang nilingkod.
Malaumon ang iyang grupo nga matuman sa presidente ang iyang mga saad kay dili sila magpakahilom kun ugaling mapakyas kini.
Si Niño Olayvar ang Anakbayan Vice-President for Visayas, miingon nga nalipay sila sa pagdeklarar sa presidente og “unilateral ceasefire” tali sa CPP-NPA-NDF, pagwagtang sa contractualization, gubat batok kurapsyon, pagpa-ubos sa income tax ug uban pa.
Nakuwangan si Olayvar sa pag-elaborate ni Duterte sa paghatag sa social services ilabi na sa edukasyon. Sa kinatibuk-an “7” nga grado ang iyang gihatag alang sa SONA ni Duterte.
Nahinangop usab sa SONA si Gob. Hilario Davide III ilabi na sa plano nga magbutang og mass transit system dinhi sa Sugbo.
Buot usab niini nga maapil ang Metro Cebu sa gipangayo sa Presidente nga emergency power sa kongreso pagsulbad sa problema sa trapiko.
Nanghinaut usab ang gobernador nga masulbad ang problema sa baha dinhi sa Sugbo. Rowena D. Capistrano ug Le Phyllis F. Antojado (BANAT NEWS)