CEBU, Philippines - Mibisita sa labing unang higayon ang bag-ong kalihim sa Department of Interior and Local Government (DILG) sa buhatan sa DILG-7 kagahapon.
Atol sa pagbisita ni Sec. Ismael “Mike” Sueno, mibahad kini sa mga mayor nga wala maglihok batok sa ilegal nga drugas sa ilang mga lugar.
Matud ni Sueno nga dili siya magpanuko sa pagpahamtang og kaso ngadto sa mga local chief executives nga lagmit muabot sa suspension kun ang problema sa drugas ug kriminalidad sa ilang lugar magpadayon.
“We will file serious neglect of duty and we will suspend them and lift their deputation over the police,”matud pa ni Sueno kinsa nagtamod sa sugo sa Presidente.
Gipasabot sa kalihim nga kun basihan ang R.A 8551(PNP Reform and Reorganization Act of 1998) ang mga mayor ug gobernador mao ang mga deputized representatives sa National Police Commission (NAPOLCOM) sa ilang mga dapit. Hinungdan nga makahimo sila sa pagsusi sa pwersa sa ilang kapulisan ug aduna silay gahum nga makamando kanila.
Bahin sa gihimong aksyon ni Cebu City Mayor Tomas Osmeña nga mihunong sa pagsuporta sa kapulisan, matud ni Sueno nga iyang girespeto ang hukom sa mayor.
Dugang niini nga andam ang iyang buhatan nga motabang ug mohatag sa gikinahanglan sa matag police units aron mapadayon ang ilang trabaho ilabina sa dakbayan sa Sugbo.
Samtang si Gob. Hilario Davide III kinsa mitambong sa labing unang SONA ni Duterte miingon nga nagpaabot siya nga ibutyag sa presidente kun kinsa kadtong mga local chief executives nga nalambigit sa ginadiling drugas o mga protektor niini. Sumala niini nga angay nga panganlan na kini kay sama sa mga pulis, ang tanang local chief executives nahimong suspek sa pagkalambigit sa gidiling drugas.
Giangkon sa gobernador nga nakadawat siya og taho nga adunay duha ka opisyal sa lalawigan kaniadto nga nalambigit sa illegal drugs. Jojo C. Ugdol ug Le Phyllis F. Antojado (BANAT NEWS)