CEBU, Philippines - Naglaraw ang konseho sa dakbayan sa Talisay nga mohimo og multi-agency committee of the whole isip tubag sa pagsulbad sa trapiko sa siyudad ilabi na sa Barangay Tabunok.
Atol sa gipahigayon nga sesyon, ang konseho niuyon nga kinahanglan nga mag-usa sila sa ubang ahensiya sa gobiyerno aron makakita og kasulbaran sa trapiko.
Ang maong multi-agency naglangkub sa City of Talisay-Traffic Operation Development Authority (CT-TODA) ingon man ang kapulisan inubanan sa nasudnong gobiyerno, ang Land Transportation Office (LTO) ug ang Department of Public Works and Highways (DPWH).
Gusto usab sa konseho nga i-apil ang Department of Trade and Industry (DTI), Department of Labor and Employment (DOLE) aron usab matagaan og alternatibong panginabuhian ang maapektuhan nga mga traysikol ug habal-habal drayber.
Si Bise Mayor Alan Bucao nagkanayon nga ang gipaila nga komitiba mohimo og hiniusang desisyon aron sa pagsulbad sa problema sa trapiko.
Samtang si Engr. Valrico Tomol sa DPWH 2nd Engineering District nibutyag nga kinahanglan gyud nila nga ibalhin ang terminal sa mga traysikol ug habal-habal layo sa flyover. Iyang gitataw nga ang pagpundo sa mga traysikol ug habal-habal sa ubos sa flyover, nakamugna og pagkabara sa trapiko.
Uyon si Bucao sa panahom ni Tomol apan iyang gipasabot nga unta adunay ma-permanenting parking area ang mga traysikol ug habal-habal duol sa karaang merkado sa Tabunok.
Dugang sa bise mayor nga ang gi-planohang komitiba mao na ang mangita og lugar aron mahimong terminal sa mga traysikol ug habal-habal apan kini mataudtauran pa kay walay luna nga gipanag-iya ang kagamhanan sa Talisay nga bakante sa pagkakaron.
Asoy pa ni Bucao nga ilang kumbinsihon ang mga drayber nga motutok og laing panginabuhian aron mamenosan ang gidaghanon sa mga traysikol ug habal-habal nga nagdagan sa dakbayan. (BANAT NEWS)