CEBU, Philippines - Natusak-tusak ang lawas sa usa ka police informant sa Cebu City Police Office human kini gipusil samtang nagsakay og motorsiklo diha sa Peace Valley Street, Brgy. Labangon ning Dakbayan sa Sugbo niadtong nakalabay nga hapon.
Dead on arrival sa Cebu City Medical Center si Jefferson Berberes, 28, alyas Puppy, taga 183 Salvador Street, Labangon.
Ang imbestigador sa Homicide Section, Senior Police Officer 2 Ruth Violango nga nahinabi sa Banat News nagkanayon nga si Berberes usa ka asset sa City Anti-Illegal Drugs Special Operations Task Group (CAIDSOTG).
Sumala pa ni Violango sakay sa iyang motorsiklo ang biktima apan pag-abot sa maong dapit kalit lang kini nga gipusil sa usa ka lalaki nga nag-atang na daan.
Matud pa ni Violango mipalit pa og pan ang gunman samtang nagpaabot sa biktima, apan walay nakatimaan kanila sa dagway niini.
Tulo ka pinusilan sa likod, usa sa atubangan nga bahin sa lawas ug usa sa ulo ang gikamatyan sa biktima. Narekober sa mga polis sa lugar ang unom ka basiyo sa bala sa kalibre .45 nga gituohang gigamit sa gunman.
Human sa pagpamusil miangkas sa nakaparada nga motorsiklo ang gunman dayon sibat.
Si Violango miingon nga posibleng ang pagka-impormante sa kapulisan ni Berberes ang motibo sa pagpatay kaniya.
Ang hepe sa CAIDSOTG nga si Sr. Insp. Eunil Avergonzado sulay unta nga gikuhaan og pamahayag sa Banat News sa maong hitabo apan nagdumili kini sa paghatag og pamahayag. (BANAT NEWS)