CEBU, Philippines - Malaumon ang kapolisan sa Siyudad sa Talisay nga matagaan na unya og sulbad ang suliran sa komunikasyon inig lingkod ni Mayor-elect Eduardo Gullas karong Hulyo 1.
Si Supt. Germano Mallari, hepe sa kapolisan sa dakbayan nagkanayon nga ang ilang komunikasyon pinaagi lang sa cellphone nga lahi ra kaayo kaysa handheld radios tungod sa kapaspason niini.
Asoy pa niya nga kun adunay alarma dali ra nga makahatud sa impormasyon ang usa ka polis ngadto sa isig ka polis ug daghan pa ang mahibawo sa gihatag nga impormasyon kun ikompara sa cellphone. Nagkanayon si Mallari nga niduso siya og request para sa handheld radio ngadto ni outgoing Mayor Johnny de los Reyes niadto pang nilabay nga katuigan apan hangtud karon wala gyud kini natuman.
“Kung handheld radio na ang atong gamit mas mopaspas pa ang atong pagresponde sa bisan unsa nga alarma,” matud ni Mallari.
Masaligon si Mallari nga mahatagan og kasulbaran ang ilang problema sa komunikasyon sa bag-ong administrasyon.
Mayoriya sa konseho nga nakadaug sa niaging piniliay mga sakop sa Alayon Party nga pinanguluhan ni Gullas.
Si Mallari nidugang nga mopadala unya siya og request ni Gullas kun siya pangayuan sa mga butang aron mapalambo ang serbisyo sa kapolisan sa Dakbayan sa Talisay. (BANAT NEWS)