CEBU, Philippines - Nagpanikad na nga ipatuman sa kapolisan sa Dakbayan sa Talisay ang pagpanakop sa mga motorsiklo nga adunay saba kaayo nga mga tambutso.
Si Supt. Germano Mallari, hepe sa kapolisan sa siyudad, niingon nga ila nang gipatuman kaniadto ang pagpanakop sa mga saba nga tambutso apan naundang.
Karong bag-ohay nga gitinguha sa umaabot nga opisyal sa nasud ang pagdili niadtong makatugaw nga kasaba sa tambutso, hayan ibalik kini sa pagpatuman ug hingusgan pa.
Si Mallari nibutyag nga daghan sa mga Talisaynon ang nangreklamo nga adunay saba nga tambutso sa motorsiklo hinungdan nga gihimo ang operasyon.
Sa mga unang nadakpan, ila kining gipangayuan sa mga dokumento sa motor ug kun makapakita, hayan ilang ipatangtang ang tambutso nga saba ug ibalik ang orihinal aron ilang hingpit nga buhian.
Asoy ni Mallari nga kadtong magbalik-balik na nilang masikop mao gyud kadtong makamulta. (BANAT NEWS)