Singaporean Nanion sa mall

CEBU, Philippines - Nabalhug sa prisohan ang usa ka Singaporean human nanion og pusil sa mga mamalitay sa palibot sa East Paris, APM Mall, Mabolo, Dakbayan sa Sugbo alas 3:30 sa nilabay’ng kadlawon.

Ang suspek giila nga si Wenbin Tan, 28, kasamtangang nagpuyo sa Barangay Kamputhaw.

Nakadawat og alarma ang kapolisan sa Mabolo hinungdan nga niresponde ug gisikop ang suspek.

Nakit-an sa sawog duol kang Tan ang kalibre .45 nga pistola nga adunay pito ka bala nga walay lisensya.

Kasong kalapasan sa election gun ban ang ipasaka batok kang Tan.

Laing nasikop sa kapolisan sa Mabolo si Jonathan Ceballos, 25, giingong sakop sa Fernandez Robbery Group, kinsa nakahulga sa mga pasahero sa Ayala Acess Road alas 12:20 sa nilabay’ng gabii.

Nakuha gikan kang Ceballos ang kalibre .38 Smith and Wesson snub nose revolver nga adunay duha ka bala.

Gitanggong na sa Camp Sotero Cabahug ang suspek.

Samtang nalandig sa tambalanan ang usa ka lalaki human gipusil sa Barangay Inayawan.

Ang pagpamusil nahitabo kilid sa Murillo Furniture Shop sa Sitio Tunob-Lapok, Inayawan alas 3 sa kadlawon kagahapon diin ang biktima giila nga si Edgardo Ensela, 26, ulitawo ug nagpuyo sa maong dapit.

Si Senior Police Officer 4 Rene Barral, desk officer sa Pardo Police Station, nagkanayon nga samtang si Ensela naglingkod sa sementong lingkuranan kilid sa shop, kalit lang gipusil makaduha gamit ang wala mailhing kalibre sa pusil sa usa ka lalaki nga nag-bonnet ug nag-jacket og itom.

Daling nisibat ang mamumuno samtang ang biktima daling gidala sa Cebu City Medical Center gumikan sa samad pinusilan sa tuong bahin sa paa. (BANAT NEWS)