CEBU, Philippines - Nikabat na ngadto sa 25,302 ka mag-uuma sa 37 ka local government units (LGUs) sa Probinsiya sa Sugbo ang naapektuhan sa grabeng kainit.
Sa 53 ka LGUs, 16 niini ang walay gikatahong danyos sa huwaw base sa report sa Provincial Disaster Risk Reduction Management Office. Lakip sa 53 ka LGUs ang Lapu-Lapu City ug Cebu City.
Nikabat na sa P140.5 milyones ang kinatibuk-ang danyos ug 3,296- ektarya ang gilapdon sa apektadong umahan.
Ang hepe sa PDRRMO, Baltazar Tribunalo, sa gipahigayong Kapistorya sa Kapitolyo kagahapon nibutyag nga ang Department of Agriculture nagpatawag og consolidation-validation sa mga LGUs.
Matud ni Tribunalo nga ang gigamit nila karon sa report ang damage assessment sa DA.
Subay niini, sa unang distrito nikabat sa P8.3 milyones ang danyos; sa ikaduhang distrito, P33.4 milyones; sa ikatulong distrito, P17.1 milyones; sa ikaupat nga distrito, P47.3 milyones; ikalimang distrito, P36.1 milyones; ika-unom nga distrito, P637, 500 ug ang ikapito nga distrito, P7 milyones ang danyos sa kaumahan.
Kabahin sa hayupan, sa ikatulong distrito nikabat ngadto sa P1.6 milyones ang danyos; sa unang distrito, P248,400; sa ikaduhang distrito, P342,200; sa ikaupat nga distrito kapin sa P1 milyon; sa ikalimang distrito, P1.4; walay report sa ikaunom nga distrito ug P676,000 sa ikapito nga distrito.
Matud ni Tribunalo nga ang probinsiya nagtutok sa maong problema diin padayon ang ilang pagpanghatag og hinabang sa mga mag-uuma sama sa bugas, hose, jerry cans ug plastic containers nga mapunduhan og tubig.
Ang P34 milyones nga Quick Response Fund (QRF) sa probinsiya nakuhaan na og P24 milyones ug P10 milyones na lang ang nahabilin.
Dugang ni Tribunalo nga nagpahigayon sila og validation sa mga nagkinahanglan gyud kaayo og tabang nga mga lugar. (BANAT NEWS)