CEBU, Philippines - Gihagit si Davao City Mayor Rodrigo Duterte sa multi-sectoral organization nga Alliance Against Tyranny, Incompetence and Greed (ASTIG) sa Sugbo nga “magpakalalaki” siya ug motunga ugma adto sa BPI-Julia Vargas Branch sa Pasig City aron pirmahan ang waiver ug ipasusi ang iyang bank account.
Samtang gidawat tuod ni Duterte ang hagit apan niingon nga mosugot siyang susihon ang iyang bank records apan ipaagi niya sa iyang abogado nga si Salvador Panelo. Si Noel Tabasa, lead convenor sa Astig-Cebu, nagkanayon nga kun ang minilyon ka pesos nga deposito ni Duterte nakuha niya sa tinarung, wala siya’y angay’ng kahadlukan.
Matud ni Tabasa nga sa usa lang ka account ni Duterte sa BPI-Pasig City, ang mayor giingong may kapin P121 milyones nga deposito uban sa asawa ug anak.
Matud sa grupong Astig nga si Duterte sayo pa nanghimakak nga may bank account siya sa BPI-Pasig City, apan sa ngadto-ngadto niangkon ra. Si Senador Antonio Trillanes IV maoy nibulgar nga ang mayor may mga secret accounts sa lainlaing bangko.
Sulod sa pipila ka tuig, si Duterte giingong nakabaton og pito ka joint accounts sa BPI Branch sa Julia Vargas Avenue, Pasig City; laing siyam ka joint accounts sa BPI-Edsa Greenhills Branch; ug usa ka joint account sa Banco de Oro-Unibank-1 sa Davao City.
Ang joint accounts sa mga Duterte sa BPI-Edsa Greenhills giingong adunay P667 milyones ug ang BDO-Unibank accounts adunay P534 milyones.
Si Tabasa nakadungog nga ang kinatibuk-ang deposito ni Duterte moabot og kapin sa P2 bilyones mao nga angay niya kini nga ipatin-aw nga legal ang gigikanan niini. (BANAT NEWS)