Motor nagsungag, 1 patay
CEBU, Philippines - Patay ang usa ka tawo ug laing duha ang kritikal ang kahimtang dihang ang motorsiklo nga ilang giluwanan ang kalit lang nagkasungag sa Ylaya, Cogon, Dakbayan sa Danao alas 2 ang takna sa hapon sa niaging adlaw.
Si Senior Police Officer 1 Reynante Manulat, imbestigador sa traffic section sa Danao City Police Station niila sa namatay nga si Jake Labador Rom, 18, taga Camansi, Togonon sa maong dakbayan.
Dugang ni Manulat nga ang backrider sa namatay nga si Arvin Mante, 15, ang grabeng naangol ingon man si Arquilis Perez Avila, 47, taga Poblacion sa maong dakbayan kinsa nagmameho sa gikasungag nga motorsiklo.
Si Manulat niingon nga pulos kusog nga nagdagan sa managlahing direksiyon ang duha ka motorsiklo ug kalit lang nagkasungag hinungdan sa pagkalagpot sa mga sakay niini.
Ang mga biktima nga pulos walay helmet ang nakasinati og grabeng kadaut sa kalawasan apil na sa ilang mga ulo nga nakaingon sa grabe nilang pagkaangol.
Dali nga gidala ang tulo ka biktima sa Danao Provincial Hospital apan si Rom nga grabeng kadaut sa lawas ang naangkon ang gideklarar sa mga doktor nga dead on arrival.
Ang duha nga sila si Avila ug Mante ang gibalhin sa Vicente Sotto Memorial Medical Center sa Dakbayan sa Sugbo. (BANAT NEWS)
- Latest