CEBU, Philippines - Nikabat sa P200 mil ang kantidad sa drugas nga nasakmit sa mga sakop sa City Intelligence Branch sa Cebu City Police Office atol sa dungan nga pagsilbi sa mga search warrants sa Sitio Santo Niño, Barangay Luz pasado alas 11 sa nakalabay nga gabii.
Upat ka balay ang gisilbihan sa search warrant nga giisyu ni Judge Gilbert Moises apan tulo lang ka balay ang nakuhaan og mga ebidensiya ug pulos wala’y nasikop nga mga tawo.
Target sa operasyon nga gipangulohan sa hepe sa CIB, Supt. Palaleo Addag, sila si Alfie Sabas, Jun-jun Fat ug Pablo Egoy nga pulos nagpuyo sa mao’ng dapit.
Sulod sa balay ni Fat ug Sabas narekober ang nagkadaiya’ng drug paraphernalia samtang sa balay ni Egoy nakuha ang tulo ka dagku’ng putos, siyam ka medium ug tulo ka gagmay nga putos sa gituohang shabu.
Bisan nakasibat ang mga suspek, pasakaan gihapon og kaso sa kapolisan.
Samtang nadakpan usab sa mga sakop sa Guadalupe Police Station ang lalaki nga numero 3 sa ila’ng listahan sa “Lambat Sibat” sa kapolisan.
Sa nakalabay nga hapon nadakpan si Jonuar Caballes, 31, taga Sambag 2, Guadalupe.
Narekober sa mga polis gikan ni Caballes ang lima ka gagmay nga pakete sa gituohang shabu ug gitanggong na sa selda sa Guadalupe Police Station ang dinakpan.
Sa laing bahin, nadakpan ang mga nagsuyop ug nagbaligya og shabu sa managlahi’ng operasyon sa Dakbayan sa Mandaue ug Danao.
Si Senior Police Officer 2 Jaime Maroleña sa Danao City Police Station niila sa nadakpan nga sila si Diosdado Obespo, 54, taga Poblacion, Carmen; Jose Lucero, 30, Jaymar Rios, hingkod, Joel Benitez, 33, pulos taga Lanipga, Carmen.
Matud ni Maroleña nga nalabyan sa team nga nagpatrolya ang usa ka payag diin namatikdan ang nagsuyop og shabu nga grupo sa mga lalaki hinungdan nga dali kini nila’ng gidakop ug nasakmit ang tagsa ka gigamit nga pakete sa shabu ug mga drug paraphernalia.
Samtang nadakpan usab sa kapolisan sa Mandaue City Police Office (MCPO) ang pusher og shabu nga giila nga si Roldan Mendoza, 43, taga Barangay Cubacub atol sa buy-bust operation.
Sa pagrekisa laing pakete sa shabu ang nakuha. (BANAT NEWS)