Gigutom nangawat og hotdog

CEBU, Philippines - Tungod sa kagutom napugos sa pagpangawat sa usa ka plastic nga hotdog ang 24-anyos nga lalaki gikan sa usa ka burger store sa F. Llamas Street, Punta Princesa, Dakbayan sa Sugbo pasado alas 8 sa nakalabay nga buntag.

Si Jason Pabuaya, ulitawo nga taga Genes Street, Sawang Calero, nadakpan sa kapolisan ug sa mga habal-habal driver human sa ginukdanay diha’ng iya’ng gidagan ang usa ka plastic nga may sulod 20 kabuok hotdog.

Sumala pa ni Police Officer 1 Merlo Laborte sa Punta Princesa Police Station nga samtang nagluto og burger ang tindera sa Minute Burger, hinay-hinay usab diay nga gikuha ang plastic sa burger.

Deretso dayon kini nga nidagan ug nisakay og public utility jeep paingon sa Tres de Abril.

Atol sa hitabo adunay mga habal-habal drivers nga nakakita sa hitabo ug mao’y nigukod sa suspek samtang human nakadawat sa impormasyon ang mga polis dali usab sila nga niresponde.

Wala pa hingpit nakapalayo ang suspek nga kini nadakpan ug narekober ang dala nga plastic sa hotdog.

Matud ni Laborte nga diha’ng iya’ng nahinabi si Pabuaya kini niingon nga iya’ng gikuha ang plastic gumikan kay siya gigutom.

Kini usab nitug-an nga namatay daw ang iya’ng amahan ug igo lang usab gihatag sa iya’ng kauban ang plastic apan sa pagsubay sa kapolisan wala’y gikataho’ng kauban si Pabuaya atol sa hitabo.

Gitanggong na sa selda sa Punta Princesa Police Station ang suspek ug gikatakda’ng pasakaan sa tukma’ng kaso. (BANAT NEWS)