CEBU, Philippines - Gisalig sa kamaayo ug panabang sa Ginoo ang kalampusan sa ikatulo ug ikaupat sa Physical Therapy Board Examinations niadtong nilabay nga Pebrero 7-8, 2016.
Matud ni Nico Merrill Hordista, 3rd placer, gradwado sa Cebu Doctors University, taga Tagbilaran City, nga ang labing hagit nga iyang giatubang mao ang pagtuon sa labihang kadaghang tun-anan nga moabot siya hangtud sa alas dos sa kadlawon.
Sumala pa ni Hordista nga wala siya nagmahay sa mga kalisdanan nga iyang naagian sa pag-review tungod kay nagmabungahon man usab ang resulta niini.
Iya gihimong inspirasyon ang iyang pamilya, higala nga hugot kaayo ang suporta kaniya ug labaw sa tanan ang Ginoo nga maoy naghatag sa tanan niyang naangkon nga kalampusan. Gibutyag ni Hordista nga gihimo niyang sumbanan ang iyang mga ginikanan kinsa pulos occupational therapists sa gawas sa nasud ug awhag niya sa tanan nga nangandoy nga maningkamot gyud tungod kay aduna gyud kini’y maayong resulta ug dili usab kalimtan ang pagtuo ug pagsalig sa Labaw nga Makagagahum.
Samtang ang ikaupat nga pwesto nga si Nancy Karen Sabandal sa Southwestern University, lumad nga taga Bato, Leyte, nibutyag nga wala siya magdahum nga malakip sa ma-top sa exams kay mao lang ang iyang tinguha nga makapasar tungod sa kalisud.
Sumala pa ni Sabandal nga 90 porsiyento sa iyang kalampusan iyang gitugyan sa Ginoo ug 10 porsiyento lang sa iyang pagtuon.
Si Sabandal ni-graduate nga salutatorian sa elementarya, honor roll sa high school ug hapit ma-cum laude sa college apan kuwang lang og .01 ang iyang grado hinungdan nga awhag niya sa mga batan-on nga dili mohunong sa pagpangandoy hangtud dili makab-ot ug dili kalimtan ang Ginoo nga maoy himuong sentro sa kinabuhi.
Laraw ni Sabandal nga mangita og trabaho sa Sugbo ug kung dunay kahigayunan nga makatrabaho siya sa gawas andam usab siya niini. (BANAT NEWS)