CEBU, Philippines - Usa sa mga oposisyon sa Talisay salig sa kapabilidad ni Bise Presidente Jejomar Binay nga United Nationalists Alliance (UNA), kini samtang nagpaabot pa sila sa dangatan sa ilang gisuportahang kandidato nga si Sen. Grace Poe sa partido Nationalist Peoples Coalition.
Si Bise Mayor Romeo Villarante sa Dakbayan sa Talisay kinsa magpapili pagkamayor sa sunod nga piniliay wala pa modesisyon kun mosunod ba kini sa One Cebu kansang kandidato mao si Winston Garcia nga misuporta na sa UNA.
Si Villarante daan nang mipadayag nga iyang suportahan si Garcia ug ang One Cebu.
Matud pa ni Villarante nga daghan pa sa ilang sakop ang nagbaton og Certificate of Nomination (CONA) gikan sa Nationalist Peoples Coalition (NPC) nga mao ang ilang nasudnong partido nga mituboy usab kang Senadora Grace Poe sa pagka-presidente.
Si Villarante nisaysay nga mag-agad lang una sila sa kamanduan sa ilang nasudnong partido nga mao ang Nationalist Peoples Coalition (NPC).
Hinuon girespeto ni Villarante ang desisyon ni Garcia pagdapig sa UNA.
Apan kun sila ang hatagan og kagawasan sa NPC mosunod siya ni Garcia sa pagpaluyo ni Binay.
Sa nasayran, si Villarante ang una nga nipadayag sa pagpaluyo ni Senador Grace Poe apan nihulagway nga wa pa gyud kini makalihok sa iyang tinguha gumikan usab sa giatubang nga disqualification case.
Iyang gihulagway nga samtang nagkaduol ang eleksyon sila ang nagpabiling wala pay klaro tungod sa maong sitwasyon ni Poe.
Hinuon siya niangkon nga si Binay nag-atubang usab og daghang kaso apan siya nagtuong adunay katakos ang bise presidente nga mahimong presidente.
Sa Talisay, mag-atbang ang mga lokal nga kandidato pagkamayor nga sila si Mayor Johny Delos Reyes sa Liberal Party, kanhi kongresista Eduardo “Eddiegul” Gullas sa Alayon Party ug si Villarante. (BANAT NEWS)