CEBU, Philippines – Nasikop ang usa ka ginang atol sa buy-bust operation apan laing babaye ang nakasibat sa duha ka sitio sa Barangay Tanke, Siyudad sa Talisay niadtong Sabado sa gabii.
Unang nirumbo ang kapolisan sa Sitio Tunga human ang ilang subject nga si Rochel Cabanes ang nikagat sa ilang kaubang polis nga nagsilbi’ng poseur buyer.
Apan dihang gidumog sa kapolisan, abtik si Cabanes nga nakadagan sulod sa ilang panimaye dayun lapos sa laing balay hangtud nga wala na igkita.
Human sa singko minutos, ang kapolisan nihimo sa laing operasyon diin si Milagros Cabardo, 50-anyos, nga taga Sitio Galaxy ang ilang subject.
Si Cabardo ang wala na makadagan pa ug nakuhaan og 19 ka gagmay nga pakete sa shabu nga nitimbang og .38 gramos ug mahalin og P4,484 kun kini ibaligya sa tag P236 ang usa.
Si Cabardo ang gitanggong sa kapolisan ug gikatakdang pasakaan og kaso samtang si Cabanes ang ilakip nila sa pasakaan og kaso bisan og wala kini nasikop.
Samtang duha ka gikatahapang pusher og shabu ang nadakpan sa managlahing takna ug dapit sa Lungsod sa Liloan ug nasakmit ang mokabat sa P500 mil nga kantidad sa shabu, mga drug paraphernalia, armas ug uban sa mga bala.
Si Police Officer 3 Jayson Gayo sa Liloan Police Station niila sa mga nadakpan nga sila si Ramil Revillas, 45-anyos, taga Barangay Yati, ug Junrey Pitogo, 29-anyos, taga Barangay San Vicente.
Ang hepe nga si Senior Inspector Ramil Morpos ang nangulo sa buy-bust operation alas 2 pasado sa niagi’ng kadlawon hinungdan sa pagkasikop ni Revillas.
Nasakmit kang Revillas ang usa ka medium-size nga shabu nga gipalit sa ilang poseur buyer og P1,000 ug dihang girekisa nakuha ang duha pa ka dagkong pakete sa shabu ug gibanabana’ng mokantidad og P141,600.
Samtang si Pitogo nakuhaan og tulo ka dagkong pakete sa shabu nga nagkantidad og P295 mil.
Nasakmit usab kang Pitogo dihang girekisa ang 357 nga armas uban sa tulo ka bala. – /GMR) (BANAT NEWS)