CEBU, Philippines – Temporaryo’ng sirad-an ang Cebu South Bus Terminal sugod karong adlawa hangtud sa alas 10 sa gabii ugma aron paghatag og dalan sa solemn procession ug Sinulog grand parade.
Matud ni Atty. Rey Gealon, pangulo sa Cebu City Transportation Office, nga nipadala na siya og pahibalo kang Gobernador Hilario Davide III may kalabutan sa pagsira sa terminal.
Awhag ni Gealon sa mga may sakyanan sa pagbilin na lang niini sa ila’ng panimalay aron dili makapuno sa traffic gumikan sa pagsira sa pipila ka mga dalan.
Ang mga bus gikan sa habagatan anha ra kutob sa South Road Properties diin mga tent, portalets ug uban nga mga panginahanglanon ang gipahimutang na sa mao’ng lugar.
Samtang ang mga tinugyanan sa Land Transportation Franchising and Regulatory Board mopahigayon usab og pagsusi sa mga colorum nga mga sakyanan ug mapahimuslanon nga mga drivers. (Rowena D. Capistrano/GMR)(BANAT NEWS)