CEBU, Philippines - Nadakpan sa mga sakop sa City Intelligence Branch (CIB) sa Cebu City Police Office ang usa ka drayber sa public utility jeepney sa pagpayuhot og gidili’ng drugas sa Sitio Back Japer, Quiot pasado alas 9 sa nakalabay nga gabii. Ang dinakpan giila nga si Romel Jumao-as, 44, lumad nga taga Probinsiya sa Bukidnon.
Nakuha sa kapolisan gikan ni Jumao-as ang 44 ka gagmay nga pakete sa shabu nga kantidad og P21,000 human sa buy-bust operation.
Gitanggong na sa selda sa CCPO detention cell ang dinakpan nga gikatakdang pasakaan og kaso.
Samtang si Police Officer 3 Ryan Talle sa Liloan Police Station niila usab kang Leo Piscante, 38-anyos, nga nagpuyo sa Barangay Catarman, ang naaktuhan nga nagsuyop og shabu hinungdan nga nasikop ug nasakmit ang gamay nga pakete’ng shabu.
Matud ni Talle nga nakadawat sila og tawag sa telepono nga nagpahibawo labot sa grupo sa mga lalaki nga nagsuyop og shabu sa mao’ng dapit.
Diha’ng gisusi, bugtong si Piscante na lang ang nahabilin nga naabtan kinsa nasikop ug nasakmitan og drug paraphernalia. (BANAT NEWS)