CEBU, Philippines – Tungod sa mga nanggawas nga isyu sa kurapsiyon sa buhatan sa Bureau of Internal Revenue ug Bureau of Customs, tinguha ni Davao City Mayor Rodrigo Duterte nga wagtangon ang mao’ng mga ahensiya kung siya mahimo’ng presidente sa nasud.
Kini ang gipadayag ni Senador Alan Peter Cayetano, kandidato sa pagka-bise presidente kauban ni Duterte isip sulbad sa problema.
Matud ni Cayetano nga ang pagtangtang sa mga tawo nga nalambigit sa pagpalusot sa mga kontrabando ug kurapsiyon ang sulbad nga nakita ni Duterte.
Sumala pa ni Cayetano nga mahilig mamahayag si Duterte og mga pulong nga gitawag og figure of speech butang nga dili sabton nga literal ang pagsabot niini.
Gipasabot ni Cayetano nga dili makwestiyon ang political will ni Duterte nga makita sa Dakbayan Davao.
Ang BOC mao’y gitahasan sa gobiyerno nga mopatuman og balaud sa pagpahamtang og buhis sa mga kargamento nga gikan sa gawas sa nasud.
Samtang ang BIR ang gitahasan nga mangolekta og buhis sa tanang negosyo ug mga tawo sa nasud diin ang makolekta mosulod sa panudlanan sa nasudnong gobiyerno.
Matud ni Cayetano nga panahon na nga batukan ang problema sa kurapsiyon sa nasud nga mao’y hinungdan sa pagsaka sa gidaghanon sa mga pobre.
Gipasabot ni Cayetano nga ubay-ubay na ka balaud sa nasud ang napanday apan kini wala mapatuman tungod sa personal interest ug kakuwang sa political will. (Renan Alangilan/GMR)(BANAT NEWS)