CEBU, Philippines - Ang Labangon Barangay Council gusto nga magpakisayod gikan sa duha ka opisyal sa City Hall kun ngano nga adunay mga tawo nga nangolekta og parking fees sa mga tag-iya’g sakyanan nga mi-parking kilid sa menteryo municipal ug nangangkon nga sila ilang mga sinugo.
Si Kapitan Victor Buendia miingon nga siya ug ang ubang mga opisyal sa Barangay Labangon gusto nga magpakisayod nila ni City Administrator Lucelle Mercado ug ni Dr. Ester Concha, ang hepe sa Department of Social Welfare and Services (DSWS).
Matud ni Buendia nga kaniadtong All Saint’s ug All Soul’s Days, adunay mga tawo nga nangolekta og parking fees sa mga tag-iya og sakyanan nga mi-parking kilid sa sam-ang.
Diha nga ang mga tawo gipangutana kun ngano nga nangolekta sila og parking fees, mitug-an ngadto ni Konsehal Norvic Abella nga adunay kamandoan gikan ni Dr. Mercado ug ni Concha nga mangolekta sila og parking fees.
Ang laing konsehal nga si Rudolfo Tabasa, alyado sa Team Rama, mitug-an nga gipatawag sila og tigum sa duha ka opisyal sa City Hall ug gimandoan sa pagpangolekta og bayad sa pag-parking.
Apan sila si Mercado ug Concha kusganong nanghimakak og kalambigitan sa pagpangolekta sa parking fees. (BANAT NEWS)