CPDRC Dancing Inmates mosayaw alang sa IEC

CEBU, Philippines – Nabantog nga Cebu Dancing Inmates mipakita sa ilang Demonstration Dance alang sa umaabot nga International Eucharistic Congress nga ipahigayon dinhi sa Dakbayan sa Sugbo sunod tuig.

Malipayon ang mga binilanggo nga nahatagan og kahigayonan nga makaapil sa dakong kalihokan sa Simbahang Katoliko bisan dili sila makagawas sa prisohan pinaagi na lang sa pagpakita sa ilang sayaw nga gibase sa opisyal theme song sa 51st IEC nga Christ in you our hope of Glory.

Gipadayag sa choreographer nga si Vince Rosales nga upat ka adlaw nilang gitun-an ang theme song sa IEC. Dili mominos sa usa ka libo ka mga dancer ang laraw nga mopakita sa ilang sayaw nga i- shoot karong Disyembre 26 diin mga komitiba sa IEC 2016 ang mosaksi kauban ni Archbishop Jose Palma.

Sumala pa ni Rosales, i-record ang sayaw aron ipakita sa mga delegado nga moapil sa kalihukan, diin makita sa performance nga ipakita sa mga priso ang logo sa IEC ug uban pa.

Gibutyag ni Rosales, bisan og wala pa sila masayod kung personal ba nga mobisita sa CPDRC ang mga delegado sa IEC andam silang mosayaw sa ikaduhang higayon sa ilang halad kung kini pangayuon.

Alang sa mga binilanggo dako kaayo nilang kalipay ug garbo nga nahatagan og importansya sa usa ka international activity sa simbahan bisan naa sila sulod sa prisohan.

Matud pa ni Evelyn Granada, lisod-lisod gyud una ang ilang pagporma sa maong sayaw, apan sulod sa usa ka oras sa una nila nga praktis nakuha ra usab nila. Si CPDRC Jail Warden Romeo Manansala nipadayag nga ang sayaw sa mga inmates maoy ikaduha nilang higayon nga nihalad, ang una gihimo atol sa pagbisita ni Pope Francis sa Pilipinas.  – /EIM) (BANAT NEWS)