CEBU, Philippines – Gipusil patay atubangan sa gikaduwa og tong-its ang 29-anyos nga lalaki sa Highway Looc, Dakbayan sa Danao alas 9 pasado ang takna sa niagi’ng Domingo sa gabii.
Si Police Officer 3 Roselo Campo sa Danao City Police Station niila sa biktima nga si Jollan Ponce, ulitawo nga nagpuyo usab sa mao’ng dapit.
Matud ni Campo nga nalingaw kaayo ang biktima sa pagduwa og tong-its kauban sa iya’ng mga higala sa gawas sa ila’ng panimalay diha’ng kalit lang nitumaw ang nag-bonnet nga lalaki ug gipusil ang biktima.
Dugang ni Campo nga naigo sa tuo’ng tampihak ang biktima ug nilapos ang bala sa wala’ng bahin nga nakaingon sa hinanali’ng kamatayon niini.
Human sa pagpamusil ang mga kauban sa biktima nga nakalitan ang wala na ilakip sa pagpusil hinuon nagdali kini sa pagsibat pahilayo sa mao’ng dapit.
Si Campo niingon nga ang namatay wala’y natala nga dautang binuhatan sa mao’ng lugar ug wala’y natala nga kaso sa buhatan sa kapolisan. – /GMR) (BANAT NEWS)