CEBU, Philippines – Gipasidan-an sa Office of the Ombudsman-Visayas ang mga opisyal ug kawani sa kagamhanan nga mag-atubang sila og silot kun sila mag-solicit ug modawat og mga regalo, ilabi na niining panahon sa Pasko.
Giingon nga usa sa mahinungdanong hiyas sa pagsaulog sa Pasko mao ang paghinatagay og mga regalo, apan alang sa mga kawani ug opisyal sa gobiyerno kinahanglan sila nga magmatngon.
Matud ni Atty. Maria Corazon Naraja, ang tigpamaba sa Ombudsman-Visayas, nga adunay balaod nga nagdili sa mga opisyal ug kawani sa kagamhanan sa pag-solicit ug pagdawat og mga regalo, ma-kuwarta man o butang.
Gibutyag ni Naraja nga dili sila magduha-duha sa pag-imbestigar sa mga hingtungdang opisyal ug kawani sa kagamhanan nga ireklamo sa maong kalapasan. Apil nga gipahimangnoan sa Ombudsman ang mga opisyal ug kawani sa kagamhanan nga adunay government-issued vehicle nga dili kini gamiton sa personal aron dili sila mag-atubang og problema. (BANAT NEWS)