CEBU, Philippines – Kritikal ang kahimtang sa usa ka lalaki human giingong miambak kagahapon sa hapon sa Marcelo Fernan Bridge, habig sa Barangay Opao, sa Dakbayan sa Mandaue.
Gidala dayon sa mga sakop sa Emergency Rescue Unit Foundation Inc. sa tambalanan si Romeo Sala, 25, taga Barangay Opao, human nga nakaangkon og kadaot sa iyang lawas.
Si Senior Inspector Neolie Laturnas, hepe sa Police Station 5 sa Mandaue City Police Office nga nahinabi sa Banat News miingon nga pasado alas 3 kagahapon sa hapon nakadawat sila og tawag sa usa ka concerned citizen nga mipahibalo nga may usa ka lalaki nga padulong moambak sa taytayan.
Miadto dayon sila sa maong lugar sa pagsusi sa maong taho apan mao na lay ilang naabtan nga naa na sa ubos sa taytayan ang maong lalaki.
Sumala pa niya nga mitungtong ang maong lalaki sa kilid sa taytayan ug miambak sa ubos ug didto mitugpa sa may sagbot nga Bermuda. Apan may taho nga nagkanayon nga naglaslas pa sa iyang pulso si Sala sa wala pa kini moambak sa taytayan.
Wala pa hinuon mahibalo ang mga imbestigador sa Station 5 kun unsay hinungdan sa pag-ambak ni Sala.
Nalandig sa Vicente Sotto Memorial Medical Center ang maong lalaki aron kini matambalan sa kadaot nga iyang naangkon. (BANAT NEWS)