CEBU, Philippines - Pormal nga gisang-at kagahapon sa buhatan sa Commission on Elections-Cebu Province ang certificate of candidacy ni kanhi Compostela mayor Gilbert Wagas sa pagka-kongresista sa ika-lima’ng distrito sa Probinsiya sa Sugbo.
Si Virginia Velasco kinsa ni-withdraw sa kandidatura ang nidala sa COC ni Wagas isip iya’ng hulip ubos sa United Nationalists Alliance (UNA) nga gipangulohan ni Bise Presidente Jejomar Binay.
Bitbit ni Velasco ang special power of attorney (SPA) sanglit tua man sa New Bilibid Prison si Wagas samtang giapelar pa sa Korte Suprema ang iya’ng kaso nga hinungdan sa iya’ng pagkabilanggo.
Gidawat ni Provincial Election Supervisor Lionel Marco Castillano ang COC ni Wagas.
Sa niagi’ng adlaw, si Bise-Mayor Jose Antonio Nemenio sa Barili ang gihulipan usab sa pagka-mayor ni kanhi konsehal Jay Ruiz ubos sa Liberal Party.
Karong adlawa ang katapusang adlaw nga gitugot sa Comelec nga mahulipan kadto’ng mosibog sa ila’ng kandidatura basta pareho’ng gikan sa sama’ng partido.
Gipahibawo ni Castillano nga kutob ra alas singko karong hapon nila dawaton ang COC sa mga puli nga kandidato. (BANAT NEWS)