CEBU, Philippines – Makighimamat sa iya’ng mga paryente sa Sugbo karong Huwebes ang kandidato sa pagka-bise presidente sa Liberal Party nga si Kongresista Maria Leonor “Leni” Gerona Robredo sa Camarines Sur.
Ang pamilya’ng Gerona magpahigayon sa ila’ng reunion sa daan nga Tabuelan Sports Complex nga pasiugdahan ni Mayor Rex Casiano Gerona ug igsuon, Bise Mayor Raul Gerona kinsa mga anak sa kanhi mayor nga si Casiano Dabalos Gerona.
Gikatakda nga moabot si Robredo sa Lungsod sa Tabuelan alas 8 sa buntag, matud ni kanhi Provincial Secretary, Atty. Aniceta Gerona Pasaylo.
Nanawagan si Pasaylo sa ila’ng kabanay sa bisan unsa nga apelyedo nga may kaliwat nga Gerona sa tibuok probinsiya sa Sugbo sa pagtambong.
Gawas sa Tabuelan, ang mga Gerona anaa usab sa Dakbayan sa Bogo, San Remigio, Borbon, Tabogon, Tuburan, Dakbayan sa Sugbo ug Mandaue.
Matud ni Pasaylo nga niadto pa’ng Hunyo gikatakda ang panaghimamat sa pamilya’ng Gerona pinaagi sa ila’ng pamilya sa San Isidro, Davao Oriental.
Nanghinaut si Pasaylo nga niini’ng higayuna ila masubay ang kagikan ni Robredo ug sa mga Gerona sa Sugbo.
Ang kagikan ni Robredo gikataho nga lumad sa Lungsod sa Bulan sa Probinsiya sa Sorsogon.
Si Robredo naminyo sa kanhi kalihim sa Department of Interior and Local Government nga si Jesse M. Robredo sa Dakbayan sa Naga kinsa namatay sa pagkahagsa sa eroplano sa Masbate niadto’ng 2012. (BANAT NEWS)