CEBU, Philippines – Nagpakita kung unsa nga klase sa pagka-opisyal si Bise Gobernador Agnes Magpale sa iya’ng pagpanghimakak nga siya niingon nga bangkarota na ang panudlanan sa kagamhanang probinsiyal.
Kini ang paghulagway ni kanhi kongresista Nerissa Soon-Ruiz kinsa makig-atbang kang Magpale sa pagka-bise gobernador ubos sa One Cebu Party sunod tuig nga eleksiyon.
Nasayran nga diha’ng nilingkod si Magpale isip acting governor niadto’ng Disyembre 2012, nipahibawo kini nga bangkarota ang panudlanan sa panahon ni kanhi gobernador, karon Kong. Gwendolyn Garcia, ug gibakwi niya sa niagi lang semana.
“Di man intawon na maayo’ng mamakak ta. Labi na gyud og dali kaayo’ng masakpan ato’ng bakak. Kapagya ato’ng claim niya pag 2013 nga bankrupt ang Kapitolyo. Ug sayop to’ng mga news about her claim, kaniadto ra unta niya gi-correct ug gi-deny, ngano’ng karon ra man two years later?” matud ni Soon-Ruiz.
Matud ni Magpale nga wala siya nisulti nga bangkarota na ang Kapitolyo ug igo lang siya nangutana kang kanhi provincial treasurer Roy Salubre kung bangkarota na ba ang probinsiya.
Gitumbok ni Soon-Ruiz ang report sa Commission on Audit nga nag-una ang probinsiya sa financial equity nga nagmatuod nga sayop ang deklarasyon ni Magpale.
Gani ang mao’ng isyu ang gigamit sa mga kaatbang sa politika ni Garcia sa niagi’ng eleksiyon. “So, pasabot ba niya nga ang tanang media nga ni-report ato sa una mao’y bakakon?” matud ni Soon-Ruiz. (BANAT NEWS)