CEBU, Philippines – Nangayo og tabang sa buhatan sa Ombudsman si Bise Mayor Edgardo Labella aron mandoan ang konseho sa Dakbayan sa Sugbo nga tukion ang P2.8 bilyones nga Supplemental Budget No. 1 nga giduso ni Mayor Michael Rama.
Sa iya’ng lima ka pahina nga suwat ngadto ni Deputy Ombudsman Paul Elmer Clemente, si Labella nagkanayon nga wala na’y rason pa ang konseho nga dili nila diskutihon ang gisugyot nga budget sa mayor.
Matud ni Labella nga karon nga gi-dismiss na sa hukmanan ang Petition for Declaratory Relief nga gipasaka ni Atty. Romulo Torres, angay na nga ipadayon ang pagtuki sa budget.
Si Labella niingon nga ang buhaton sa konseho mao ang pag-aprobar, paglaslas sa pundo nga dili nila mauyonan o kaha ang dili pag-aprobar sa kinatibuk-ang budget ug ibalik kini sa executive department.
Apan si Konsehal Sisinio Andales, tsirman sa committee on laws sa konseho, niingon nga dili pa final ang hukom ni RTC Judge Alexander Acosta kay mahimo pa nga si Torres moapelar.
Ang P2.4 bilyones sa giduso nga SB-1 gitagana sa pagbayad sa nahabiling utang sa dakbayan sa Japan kabahin sa pagmugna sa SRP, ang P87 milyones alang sa dugang bayad sa paghipos sa mga basura, ug ang P77 milyones alang sa bonus sa mga opisyal ug kawani sa City Hall.
Malaumon si Labella nga ang Ombudsman momando dayon sa mga sakop sa konseho sa dakbayan nga padayunon na nila sa pagdiskutir ang gisugyot nga budget sa executive department.
Si Labella nibutyag nga una’ng higayon kini nga nagpadala siya og suwat hangyo sa Ombudsman tungod kay adunay nakita niya nga dinalian nga pagtagad sa pagbayad sa utang sa SRP aron dili na magsangkiig ang katawhan.
Giklaro ni Labella ang iya’ng suwat nga gipadala dili reklamo kung dili usa lang ka hangyo. (Sheriza Mae R. Uy ug Rowena D. Capistrano/GMR)(BANAT NEWS)