CEBU, Philippines – Ang giingong idlas nga mamaligyaay og ginadili’ng drugas ang nadakpan sa kapolisan sa buy-bust operation sa Pit-os, Talamban, Dakbayan sa Sugbo kagahapon sa niagi’ng gabii.
Ang nasikop mao si Cort Hain Owatan Opone, 27, giingong “station level drug pusher” kinsa nakuhaan og duha ka pakete sa gidudaha’ng shabu.
Ang mga sakop sa Philippine Drug Enforcement Agency-7 ug Station Anti–Illegal Drug Special Operations Task Group (SAIDSOTG) nga gipangulohan ni Police Inspector Samson Furnales Go ang nihimo sa operasyon.
Dali’ng nasikop ang suspek pinaagi sa P200 nga marked money.
Samtang nasakmit ang armas ug mokabat sa P100,000 nga kantidad sa shabu sa gipatuman nga search warrant sa kapolisan sa San Antonio, Jubay, Liloan.
Si Senior Police Officer 1 Bryan Batiquin sa Liloan Police Station niila sa nadakpan nga si Laurence John Mendoza Malazarte, 34 anyos ug ang nakaeskapo nga kauban mao si Romeo Bargamento nga nagpuyo usab sa mao’ng dapit.
Sa Senior Inspector Ramil Morpos, hepe sa kapolisan sa lungsod, nisiksik sa panimalay ni Malazarte ug mao’y ila’ng nakuha ang duha ka dagku’ng pakete sa shabu ug 13 ka gagmay nga pakete niini.
Nasakmit usab ang mga drug paraphernalia ug armas nga kalibre .357 ug mga bala.
Samtang laing nadakpan sa Basurahan, Umapad, Dakbayan sa Mandaue nga nagdala og armas ug nasakmitan usab og shabu.
Si Police Officer 3 Wendel Belandres niila sa nadakpan nga si Daniel Satiatam, 24, taga Seaside, Pusok, Dakbayan sa Lapu-Lapu ug lumad nga taga Tubod, Lanao del Norte.
Matud ni Belandres nga nakadawat sila og taho labot sa usa ka tawo nga nagdula og billiard sa mao’ng lugar nga nagluklok og armas.
Si Superintendent Michael Anthony Bastes, hepe sa Investigation Detection and Management Bureau (IDMB) sa Mandaue City Police Office, mao’y nangulo sa pagsita ug nasakmit nila ang kalibre .45 ug usa ka gamay nga pakete’ng shabu hinungdan nga ila’ng gidakop ug gibalhug sulod sa bilanggoan. – /GMR) (BANAT NEWS)