March for Climate Justice sa Nobyembre 28

CEBU, Philippines – Mopahigayon og March for Climate Justice karong Nobiyembre 28 ang nagkadaiyang sector lakip sa simbahan ug lokal nga kagamhanan aron hingusgan ang pagpanalipod sa kalikupan.

Matud ni Fr. Alladin Luzan, OSA, convenor sa kalihukan, nga gipaabot nila ang mokabat sa tres mil ka partisipante nga motambong sa lakaw nga magsugod sa Fuente Osmeña Rotunda padulong sa Basilica Minore del Sto. Niño.

Tapuson sa usa ka Santos nga Misa ang kalihukan ug ang pagbasa sa hiniusang baruganan sa People's Climate Movement-Cebu.

Gibutyag ni Luzan nga ang naasoy’ng lakang gitumong sa pag-aghat sa tanan nga molihok alang sa environmental protection aron dili na mahiagum sa grabe’ng epekto sa climate change.

Ang convenor sa kalihukan nibutyag nga dili ra kutob dinhi ang ila’ng pagpakabana sa kalikupan tungod kay kini ang sinugdanan sa daghan nila’ng kalihukan nga giandam ug adunay posibilidad nga mopaguwa usab sila og mga giya para sa mga botante nga mopili sa mga kandidato nga may pagpakabana sa kalikupan. – /GMR) (BANAT NEWS)